10 canciones asturianes pa voz y pianu

10 canciones asturianes pa voz y pianu ye un proyeutu pa editar un discu y un llibru de partitures n’asturianu con igües de Xaime Arias y voz de Rebeca Velasco.

Esti dúo cientra la so atención nun repertoriu del folclor asturianu, la tonada, qu’escuende les melodíes más guapes y ellaboraes del mésmu. Ñaz pa entretener y tien el so espoxigue na industrialización d’Asturies, nos chigres y nos espacios de fuelgue. Esti repertoriu vive, anguaño, principalmente nos concursos folclóricos. La dificultá interpretativa del mésmu llévalu cada vez a un mayor nivel de marxinalidá pal públicu en xeneral. Esti dúo pretende caltenelu vivu, difundilu fuera de los sos calces naturales col procur de que seya reconocíu por un públicu polo xeneral ayenu a esti xéneru y que seyamos munchos los que podamos esfrutar esta ayalga asturiana.

Xaime Arias (Mieres del Camín, 1966) ye profesor nel Conservatoriu Superior de Música Eduardo Martínez Torner d’Uviéu. El mierense ye ún de los pianistes más reputaos del país y lleva bien d’años venceyáu a la tonada: compositor, intérprete acompañando al pianu a una montonera de cantadores, pianista oficial del concursu Cuenca del Caudal, xuráu en dellos concursos de canción asturiana y integrante de los grupos jazzísticos Xaime Arias Trío y Quatro Jazz Quartet.

Rebeca ye direutora de la Escuela Municipal de Música de Grau, y dirixi tamién varies formaciones musicales, nueve coros y dos orquestes. Amás recibió’l Premiu AMAS a la meyor voz en 2010 y el XI Premiu al Meyor Cantar (Premiu Camaretá) en 2019.